|
ყველა
ელფის გამომცემლობა
"პალიტრა L"
ქარჩხაძის გამომცემლობა
ბაკურ სულაკაურის გამომცემლობა
"არტანუჯი"
"დიოგენე"
|
|
მგოსანი ბიდლის ზღაპრები ავტორი: როულინგი გამოშვების თარიღი: 2012 ფასი: 8.9 ლარი |
|
,მგოსანი ბიდლის ზღაპრები’’ ჰარი პოტერის ერთგულ მკითხველებს კარგად ახსოვთ წიგნიდან ,,ჰარი პოტერი და სიკვდილის საჩუქრები’’. პატარა ჯადოქრებისთვის განკუთვნილი, შუა საუკუნეებში რუნულ ენაზე დაწერილი კრებული ალბუს დამბლდორმა ჰერმიონ გრეინჯერს უანდერძა. სწორედ ამ კრებულში განთავსებულმა ერთ-ერთმა ზღაპარმა ითამაშა გადამწყვეტი როლი იმაში, რომ ჰარი პოტერს დიდი ხნის უშედეგო ძებნის შემდეგ გამოეცნო ვოლდემორის მთავარი ზრახვები და ეპოვა მისი დამარცხების გზა.
,,მგოსანი ბიდლის ზღაპრები’’ აქამდე მხოლოდ ჯადოქრებისთვის იყო ცნობილი, ჯოან როულინგმა კი გადაწყვიტა, მაგლებისთვისაც გაეცნო ეს მშვენიერი წიგნი. კრებულში თავმოყრილი ხუთი შესანიშნავი ზღაპარი ჭკუის სასწავლებელია არა მარტო ჯადოქრებისთვის, არამედ ჯადოსნური ძალის არმქონეთათვისაც.
თითოეულ ზღაპარს თან ერთვის ალბუს დამბლდორის ბრძნული შენიშვნები და კომენტარები. |
|
ტოპო–ტიპი ძუნწობს ავტორი: გამოშვების თარიღი: 2012 ფასი: 7.9 ლარი |
|
– ტიპ, რა იქნება შენი სათამაშო დაიკოს ათხოვო ცოტა ხნით? მასაც უნდა თამაში. – არ ვათხოვებ, ჩემია! – ბუზღუნებს ძუნწი თაგუნა და თავის საყვარელ სათამაშოებს გულმოდგინედ ინახავს. მარტო თამაში ხომ ძალიან მოსაწყენია, ტიპ! იმედია, მალე მიხვდები, რომ სიძუნწე ნამდვილად არაა კარგი საქციელი.
ტოპო-ტიპი პატარა თაგუნაა, რომელსაც, ჩვენი შვილების მსგავსად, ხანდახან სულაც არ უნდა თავისი სათამაშოების სხვებისთვის თხოვება, მაგრამ ბოლოს მაინც ხვდება, რომ ჭირვეულ თაგუნასთან თამაში არავის მოსწონს და ცდილობს, აღარ იძუნწოს. |
|
ქართული მითები და ზღაპრები ავტორი: მაკა მიქელაძე გამოშვების თარიღი: 2012 ფასი: 19.9 ლარი |
|
მითებზე ამბობენ, ნამდვილია, რადგან შეუძლებელიაო. რას არ შეხვდებით ქართული მითების სამყაროში: თეთრ ჯიხვებს, უჩინარ რაშებს, შუბლვარსკვლავა ირმებს, მოტაცებულ მზეთუნახავებსა და მათ გამომხსნელ მონადირეებს; ცხრავაჟიან ქალებს, ცხრათვალა მზეს, ცხრა წყაროს, ცხრათავიან დევს, ცხრა კარასა და ცხრა მთას; ვერცხლის ტბას, ტბიდან ამოფრენილ მტრედსა და ამოვარდნილ ქარიშხალს...
აქ ორბის კვერცხებიდან ლეკვები იჩეკებიან; ოთხრქა–ოთხყურა ცხვარი მსხვერპლად ეწირება ღმერთებს; ციდან ჩამოვარდნილი ყოველი წვეთი ანგელოზად გადაიქცევა... წყლის პირას ალები, წყლისა და ტყის სულები იკრიბებიან და ფერხულში ებმებიან; ბოროტი მაქციები, დევები, ჭინკები, ქაჯები, კუდიანები და ავსულები კი ღამღამობით ბოროტების მარულას მართავენ. ბოროტებს ღვთისშვილები და გმირები ეომებიან და ამარცხებენ კიდეც, მათ ხომ ქალღმერთების მოქსოვილი ჯაჭვის პერანგები იცავს...
აქ სიცოცხლის ხე ქვესკნელში გადადგმული ფესვებით სკნელიდან ზესკნელს სწვდება. მითიურ ხარებს რქებზე სანთლებს უნთებენ, გველებს თასით რძეს ასმევენ, კლდიდან გადმოფრენილი მონადირეები ჰაერში ქრებიან. სადღაც ნატვრისთვალიც ბრწყინავს. ამ უაღრესად საინტერესო და უკიდეგანო სამყაროში მოგზაურობა ნამდვილად ღირს. |
|
ტოპო–ტიპი გააბრაზეს ავტორი: გამოშვების თარიღი: 2012 ფასი: 7.9 ლარი |
|
– ტიპ, რატომ ხარ მოწყენილი? ონავარმა ამხანაგებმა გაგაბრაზეს? ნუ ღელავ, ყური არ ათხოვო მათ და ნურც ცელქობაში აჰყვები. ცუდი საქციელი დაუსჯელი არ დარჩება, ჭკვიანი თაგუნები კი ყველას უყვარს.
ტოპო-ტიპი პატარა თაგუნაა, რომელსაც, ჩვენი შვილების მსგავსად, ხანდახან საბავშვო ბაღში ონავარი ამხანაგები აბრაზებენ, მაგრამ ის თავის დედიკოს უჯერებს და ცდილობს, ყურადღება არ მიაქციოს სხვების ცუდ საქციელს. |
|
ქილილა და დამანა ავტორი: გამოშვების თარიღი: 2012 ფასი: 10.9 ლარი |
|
ამ წიგნის ისტორია ათას შვიდასი წლის წინ დაიწყო, როდესაც ,,პანჩატანტრა'' ( ,,ხუთი რვეული'' ) გაჩნდა ინდოეთში. იგი ჯერ ირანელებმა თარგმნეს, ირანულიდან კი არაბებმა გადაიღეს.გზადაგზა მასში მრავალი ახალი იგავი შევიდა, წიგნს პირველი ორი კარის მიხედვით დაერქვა სახელიც : ,,ქილილა და დამანა''
ცნობილი ქართველი ირანისტის, მაგალი თოდუას მიერ თანამედროვე მკითხველისათვის გასაგებ ენაზე მოთხრობილი ,,ქილილა და დამანა'' ქართლის მეფე ვახტანგ VI - ის მიერ XVII საუკუნეში შესრულებული თარგმანის ხელახალი რედაქციაა. |
|
საბავშვო ბიბლია ავტორი: გამოშვების თარიღი: 2011 ფასი: 20.9 ლარი |
|
ცნობილია, რომ ბიბლია 1600 წლის განმავლობაში იწერებოდა სამ, ებრაულ, არამეულ და ბერძნულ ენაზე. მას სხვადასხვა ადგილასა და სხვადასხვა დროში მცხოვრები სხვადასხვა სოციალური ფენიდან გამოსული ორმოცზე მეტი ავტორი ჰყავს.
ბიბლია ქრისტიანების წმინდა წიგნია, მას წმინდა წერილსაც უწოდებენ. შედგება ორი ნაწილისაგან: ძველი აღთქმა და ახალი აღთქმა. ძველ აღთქმაში მოთხრობილია სამყაროს შექმნა და ადამიანთა ცხოვრება მაცხოვრის დაბადებამდე, ხოლო ახალი აღთქმა მოგვითხრობს მაცხოვრის – იესო ქრისტეს ცხოვრებას, ჯვარცმასა და ამაღლებას.
ძველი აღთქმა 65, ხოლო ახალი აღთქმა 27 წიგნისაგან შედგება. ცნობილია, რომ წიგნებს შორის ბიბლიას ყველაზე მეტი მკითხველი ჰყავს და ყველაზე მეტ ენაზეა თარგმნილი.
საუკუნეების განმავლობაში, სანამ ადამიანი საბეჭდ მანქანას გამოიგონებდა, ბიბლიის ტექსტს ხელით წერდნენ. ყველა გადამწერი დიდ დაკვირვებასა და გულმოდგინებას იჩენდა, რათა ტექსტი, მისი ყოველი აბზაცი და ყოველი ასოც კი ზუსტად ყოფილიყო გადაწერილი. ამისათვის საგანგებო წესებიც კი იყო დადგენილი...
მას შემდეგ, რაც პირველი სტამბა დაარსდა, პირველი წიგნი, რომელიც იქ დაიბეჭდა, სწორედ ბიბლია იყო.
თავდაპირველად ღმერთმა შექმნა ცისა და დედამიწის მასალა... პირველ დღეს უფალმა ბრძანა: იქმნას ნათელი! და იმწამსვე გამობრწყინდა ნათელი... უფალმა ბრძანა: გაჩნდეს ცა! და თვალის დახამხამებაში დედამიწას მოლურჯო გუმბათივით გადაეკრა ცა... უფალმა გააჩინა ცის მნათობები: მზე, მთვარე და ვარსკვლავები... ყველა სხვა ქმნილება ღმერთმა გააჩინა სიტყვით, ანუ ბრძანებით. ადამიანის შექმნა კი სხვაგვარად ინება...
ამ წიგნში მოთხრობილი ძველი და ახალი აღთქმის მოკლე ისტორია შედგენილია იაკობ გოგებაშვილის `საღმრთო ისტორიისა~ და არქიმანდრიტ ნესტორ ყუბანეიშვილის `ძველი აღთქმის საღვთო ისტორიისა~ და `ახალი აღთქმის მოკლე ისტორიის~ მიხედვით. |
|
პინოკიო (სამგანზომილებიანი, ხმოვანი წიგნი) ავტორი: კარლო კოლოდი გამოშვების თარიღი: 2012 ფასი: 29 ლარი |
|
შესანიშნავი ილუსტრაციებითა და ლამაზი, ჟღერადი მელოდიებით გაფორმებული ეს წიგნი ხის თოჯინა პინოკიოსა და მისი მამის, ჯეპეტოს ამბავს მოგვითხრობს. იმოგზაურე ცელქ, ონავარ პინოკიოსთან ერთად და გახდი მისი ხიფათიანი თავგადასავლის თანამონაწილე. წინ საინტერესო და ამაღელვებელი მოგზაურობა გელის! |
|
სიბრძნე სიცრუისა ავტორი: გამოშვების თარიღი: 2012 ფასი: 14.9 ლარი |
|
წიგნში შესულია სულხან–საბა ორბელიანის ყველასათვის ნაცნობი და საყვარელი იგავები, რომლებიც ზურა მჭედლიშვილის მიერ ორ ფერში შესრულებული უნიკალური ილუსტრაციებითაა გაფორმებული. |
|
ჩემი პირველი ქართული ლექსები ავტორი: გივი ჭიჭინაძე გამოშვების თარიღი: 2012 ფასი: 29 ლარი |
|
წიგნში შესულია გივი ჭიჭინაძის ყველა დროის საუკეთესო ლექსები.
სახალისო, საუცხოო ილუსტრაციებით გაფორმებული ეს ლექსები თქვენი შვილის პირველ საყვარელი საკითხავ წიგნად იქცევა. |
|
ილუსტრირებული სათავგადასავლო მოთხრობები ბავშვებისათვის ავტორი: გამოშვების თარიღი: 2012 ფასი: 19.9 ლარი |
|
საბავშვო სათავგადასავლო მოთხრობების ილუსტრირებულ გამოცემაში შესულია ხუთი ძალიან ცნობილი ნაწარმოების შემოკლებული და ბავშვებისათვის გამარტივებული ენით მოთხრობილი ვერსიები. პატარა მკითხველი გაეცნობა ყველასათვის ცნობილი და საყვარელი გმირების თავგადასავალს, ნახავს მათი ფათერაკებით სავსე ცხოვრების მნიშვნელოვან ეპიზოდებს. ამ წიგნის წაკითხვის შემდეგ პატარა მკითხველები შეიყვარებენ სახელგანთქმულ რაინდებს და მომავალში მათ შესახებ უფრო მეტის გაგებას მოინდომებენ. |
|
უილიამ შექსპირის პიესები ბავშვებისათვის ავტორი: გამოშვების თარიღი: 2012 ფასი: 19.9 ლარი |
|
"მეთორმეტე ღამე", "რომეო და ჯულიეტა", "ქარიშხალი", "ზაფხულის ღამის სიზმარი", "მაკბეთი", "ჰამლეტი" – მხიარული ნახატებით გაფორმებული და მარტივი, ბავშვებისთვის გასაგები ენით მოთხრობილი უილიამ შექსპირის ექვსი ყველაზე ცნობილი პიესა დამწყებ მკითხველებს მსოფლიოს ყველა დროის ამ უდიდესი დრამატურგის საოცარ სამყაროს შეაყვარებს; თითოეულ პიესაში უხვად ართული, ქართული კლასიკური თარგმანებიდან აღებული ციტატები კი ამ თარგმანების სრულად გაცნობის სურვილს აღუძრავს. |
|
პატარა ობობას საათი ავტორი: ეკა ტაბლიაშვილი გამოშვების თარიღი: 2011 ფასი: 12.9 ლარი |
|
პატარა ობობა ათ საათზე იღვიძებს და მერე მთელ დღეს ძალიან აზრიანად ატარებს; სულ რაღაცას საქმიანობს; სულ სადღაც მიეჩქარება, თანაც ყველა წუთი და წამი დაგეგმილი და წინასწარგანსაზღვრული აქვს.
მიადევნე თვალი ობობას საათის ისრებს და ნახავ, როგორ ატარებს ცხოვრებას პატარა ობობა; რა უყვარს და რას ვერ იტანს; რა იცის უკვე ძალიან კარგად და რისი სწავლა არის მისთვის აუცილებელი. ამ ყველაფერს შეიტყობ, თუ დილის ათი საათიდან ღამის ათ საათამდე მის ფუსფუსს დააკვირდები. შეგიძლია, ისიც გამოითვალო, რას რამდენ დროს უთმობს პატარა ობობა. |
|
მდინარე ავტორი: თამარ ნადარეიშევილი გამოშვების თარიღი: 2011 ფასი: 12.9 ლარი |
|
"ყველა ბავშვს აქვს საყვარელი ადგილი, სხვებისთვის არაფრით განსაკუთრებული. მისთვის კი ძალიან მიმზიდველი..." – ამის შესახებ ალბათ შენც გსმენია; იქნებ გაქვს კიდეც შენთვის ძალიან ძვირფასი ადგილი, სადაც საათობით ჯდომა არასოდეს მოგბეზრდება.
სწორედ ასეთი საყვარელი ადგილია ერთი გოგონასათვის უჩვეულო მდინარე, რომელიც ყველაფერს ფერს უცვლის. ჰოდა, მის წარმოსახვაში არსებობენ შავი თევზები, შავი გველები და შავი ბაყაყები; მეტიც, ამ გოგონასთვის ყველაფერი შავი, გოჭებიც კი, ამ მდინარის იდუმალ ძალას უკავშირდება.
ის თვითონ გიამბობს ბავშვობის უჩვეულო თავგადასავალს და თუ გულისყურით წაიკითხავ მის მონათხრობს, გაიგებ, როგორია მგრძნობიარე ბავშვის მიერ დანახული სამყარო და ამ სამყაროში როგორ უჩვეულოდ შეიძლება ჩანდნენ საგნები და მოვლენები, რომლებიც მხოლოდ მისთვის არიან "ისეთი რამით გამორჩული, რასაც მარტო თვითონ ამჩნევს, სხვები კი – ვერა". |
|
ლაშას და ლუკას თავგადასავალი ავტორი: სოფო კირთაძე გამოშვების თარიღი: 2011 ფასი: 11.9 ლარი |
|
არ გეგონოს, რომ ეს ამბავი ორ პატარა ბიჭზეა, სულაც არა! აქ ერთი ბიჭისა და მისი მეგობარი კურდღლის თავგადასავალია მოთხობილი.
ერთ დღეს ლაშა და ლუკა აგარაკზე მიდიან და მთავარი ამბავიც სწორედ აქედან იწყება. ლუკა აგარაკზე ჩასვლის პირველივე ღამით მოულოდნელად გაუჩინარდება. ლაშა კი მეგობრის მოსაძებნად უკუნ ღამეში უღრანი ტყისაკენ გაემართება, მაგრამ მისი თავგანწირვა უშედეგოდ მთავრდება, ლუკას კვალიც კი არსად ჩანს.
ალბათ გაინტერესებს, როგორ დასრულდა ეს ამბავი, ან რა მოხდა სინამდვილეში. ამ ყველაფერს კი უკვე ამ არაჩვეულებრივი წიგნიდან შეიტყობ. |
|
ლუკა – მარტოდმარტო ქვეყანაზე ავტორი: სოფიო კინწურაშვილი გამოშვების თარიღი: 2011 ფასი: 12.9 ლარი |
|
ლუკა ხუთი წლისაა და მშობლებთან ერთად ცხოვრობს. თუმცა, ერთ მშვენიერ დილას იღვიძებს და ხვდება, რომ შინ მარტოა: მხოლოდ სახლი კი არა, ქუჩაც ცარიელია, ტრანსპორტიც, მაღაზიებიც, ატრაქციონების პარკიც... ერთი სიტყვით, მის გარდა მთელ ქალაქში არავინაა.
პატარა ბიჭს სულაც არ ეშინია, პირიქით, მოსწონს მარტოობა – აბა, რა სჯობს, აკეთებ ყველაფერს, რაც მოგენებება, და შენიშვნას კი არავინ გაძლევს, თუმცა შემდეგ ...
გაინტერესებს, რა მოხდება შემდეგ? ლუკას უჩვეულო ამბავს უფრო დაწვრილებით ამ ფერადი და მხიარული ილუსტრაციებით გაფორმებულ წიგნში წაიკითხავ. |
|
|
|
|
|
საფრანგეთის ერთ-ერთმა მსხვილმა გამომცემლობა “ბენევანმა” 2012 წლის მარტის პირველ დეკადაში გამოსცა ქართული ლექსების კრებული სათაურით “ქართული ლექსების რვეული“, რომელიც შეკრიბა და თარგმნა იზა ჯინჯიხაძემ.
გამომცემლობა “ბენევანის“ პრეს-კომიუნიკეში, რომელიც დაიგზავნა საფრანგეთის სხვადასხვა მედიაში (ტელერამა, ფიგარო, ნუველ ობსერვატორი, ლიბერასიონი, პარი-მატჩი) და გავრცელდა მსოფლიოს მსხვილ ფრანკოფონურ წიგნების მაღაზიებში, წერია: “ქართული ლექსების რვეული “უმღერის და ადიდებს სიყვარულს, სიყვარულს, რომელიც, როგორც “სრული ნიჭი”, ამკობს ადამიანს და “ციცინათელასავით” უნათებს ღამეში ეკლიანსა და მძიმე ცხოვრების გზას. მოყვანილია სერჟ ანდრიოსა და ჟან ბატიუს ციტატები:
„ რა შესანიშნავი აზრია - გააცნო ფრანგულენოვან მკითხბელს შენი ქვეყანა საოცარი სილამაზის ლექსების თაიგულით და ახალი, სპეტაკი სიოს მონაბერით მრავალსაუკუნოვანი საქართველოსაგან“ ჯან ბატიუ , ისტორიულ მეცნიერებათა დოქტორი, ფრანგული ენისა და ლიტერატურის პროფესორი
„ კითხულობ ლექსებს და გიტაცებს თარგმანის საოცარი მუსიკალურობა და სიტყვების უწყვეტ ნაკადად აჟღერებული, გულში ჩამწდომი ქართული პოეზიის ფრანგული ვერსია თუმცა მთარგმნელი არასდროს არ ღალატობს ორიგინალს„ სერჟ ანდრიო , ლიტერატორი, ფილოსოფიის პროფესორი
წიგნი იყიდება პარიზსა და სხვადასხვა ქვეყნის ფრანგულენოვან წიგნების მაღაზიებში ასავე დადებულია Amazon-ზე. თბილისში წიგნი იყიდება: წიგნის სახლში (ლიტერატურული კაფე, პეკინის ქ. 31), ესპერანცაში (სენტ-ეგზიუპერის ქ.12), პარნასში (ჭავჭავაძის გამზ. 22)
|